مين كان يصدق ان النهارده كان هيبقى يوم احتفال .
مين كان يصدق ان مبارك يتخلع
مين كان يصدق ان يبقى فيه دستور جديد
من سنه فاتت واحنا كنا بنجمع توقيعات بيان التغير كانت الناس بتقول انتو بتهزروا
فى ناس كانت مصدقه انها تقدر تعمل حاجه وفى ناس كانت فكرنا بنحلم
كان فى ناس خايفه تمضى على بيان التغيير عشان امن الدوله
وعشان الخوف من كلمه المعتقلات
وكانت فيه ناس بتحاول انها تجمع التوقيعات لانها كانت شايفه ان بكره احسن
ياما كنت بقرا مقالات الراجل مقلف قصص "رجل المستحيل" الى بعنوان بكره اكيد احسن من النهارده
ياما كنت بقول الراجل ده معاه حق وبرده كنت بحس ان بكره ده مش جاى ابدا وهنفضل فى ذل وقهر من النظام السابق .
كنت بحلم زى شباب كتير انى اشوف البلد دى احلى وكل مواطن يعرف حقه وميخفشى من ظابط شرطه .
وكل يوم كان بيعدى والناس بتتكلم عن الدكتور البرادعى كانه جاى من اسرائيل ويقولوا عليه بيحلم
وبيقولوا هوه ليه مش راضى ينضم لحزب زويدخل الانتخابات والراجل كان مصر على رايه ان لازم يحصل تغيير وهوه مش هيبقى ديكور عشان الانتخابات تتزور.
وفاتت الايام وجات 2011 الى كان اولها حادث طائفى بتاع انفجار كنيسه القديسين وقلت خلاص كل الى هيكلم فى السياسه او عن البرادعى وبيان التغيير ده هيتظبط ومش بعيد يعتقل بس اسبوع والتانى مات ابو عزيزيه فى تونس الراجل الى ولع تونس وكان بقى شراره الثوره وكنت بقول خلاص المصريين معدشى عندهم كرامه وخلاص
بقى عادى ان نلاقى واحد مشنوق على الكوبرى لانه كره الحياه وشباب بيهاجر ويموت فى البحر
واستهزاء بالشعب عينى عينك وقتل المصريين فى الشارع بايد رجال الشرطه وكان واحد من الى اتقتلوا خالد سعيد الشاب الى بقى رمز لظلم الشرطه والى بقت صفحته على الفيس بوك "صفحه كلنا خالد سعيد " هيه الى بتجمع الشباب على هدف واحد انه لا للتعذيب بس مع كل الظلم ده المصريين لم يحتجوا وكان كتاب علاء الاسوانى الى بيقول لماذا لا يتظاهر المصريين ضد الظلم
زلكن خلاص الشعب فقد الامل ومعدشى الحل موجود جوه مصر .
ولكن الاجابه كانت تونس
زى ما اعلان فوادافون قلها .
اتخلقت شراره فى تونس وقفت قدام الرصاص عشان تقول لا كده كفايه حرام وفى 10 ايام كانت اول دوله عربيه تسقط رئيسها كانت البدايه
..
بعدها ب ايام قليله جات الدعوه على النت بان يوم 25 يوم الاحتجاج المصرى وكان بين 15 يوم تونس و25 يوم مصر كلام كتير زى
مصر مش زى تونس وعلى نفس المنوال .
وجه يوم 24 يوم التحضير كلمت اصحابى عشان اعرف المظاهره هتبتدى منين وبعدين كلمت اخويا الى جبلى تلفونات ومكان خروج المظاهره الى كان لسه متحدد باليل والارشادات العامه وكان اهمها البصل .
فى اليوم ده كنت خارج الساعه 1:20 عشان التجمع الساعه 2 وكنت اتغديت ونازل لقيت احلى كلام من اصحابى زى يا عم انتوا فاضيين ,ابقوا قبلونى والى كان بيقول غيروا نفسكوا هتلاقى البلد اتغيرت ونسى الكلمه الى بتقول اذا صلح الراعى صلحت الرعيه مع انه كان سلفى الى حد ما ,الى كان بيقول انزلوا نتوا الاول واول ما الشعب ينزل انا هنزل معاه .
ونزلت وبدا المظاهره .
وكان احلى حاجه ان الكلمه الى محبوسه جواك خلاص طلعت وقدرت تقول لا فات اليوم كان فيه حجات كتيير واخبار المحله والسويس والاسكندريه والقاهره كانت بتوصلنا فى المنصوره .
وعشنى يوم فيه ضرب شويه وهدوء شويه لحد ما اليل دخل وظهر الغباء وعرفنا فايده البصل وكان اول مره اشم ريحه دخان وغاز مسيل وبعد فاصل من الضرب والهروب فى الشوارع الجانبيه بدانا نمشى واحد واحد من بين الشوارع وخلاص هنتجمع بكره... ..
بس فى طريقى وانا راجع كان فيه تقفيل جامد من اللمن وكانو
كمان بيخلو سواقيين التاكسى يبلغو عن المتظاهريين لانهم كانو واخديين منهم رخصهم , لحسن حظى وقعت فى راجل محترم
كان شغال عسكرى فى الجيش فى المخابرات , انا خفت ساعت ما قالى كان شغال فى المخابرات , قلت خلاص هيسلمنى , ولكن قلى اطمن ولف بيا فى الشوارع البعيده عن الامن ووصلنى للمدينه ,
كنت راجع ميت جدا ومش قادر اتكلم
كان يوم صعب وكان عندى امتحان يوم 26 بس ربنا ستر مع انى مكنتش قادر اتكلم بس كنت مرتاح جدا لانى حسيت ان فيه حاجه غريبه هتحصل ان فى مظاهرات كل يوم
.
اليوم ده كان مليان تفاصيل فى النص بس كفايه بدايه اليوم ونهايته .
بس كانت احلى تفصيله الراجل او الشاب اوالست الى حدفت ميه على الامن المركزى لما كان حابس المتظاهريين فى حاره فى الدراسات , انا اضربت يومها وكان فيه ماسى فى الضرب , كان فيه راجل كبيروقع ومش قادر يقوم تانى رجعنا شلناه , , وصلنا العصر فى الحاره دى , وبعد ما الميه اتحدفت على الامن الشعب هاج وقدر يرجع الامن شويه صغيريين قدرنا نفلت منهم بعدها , فيه ناس اتمسكت وممشناش الا بيهم متجهيين الى المحافظه للاعتصام
فيه تفاضيل كتير جدا لسه مقلتهاش , بس غنينا دى لما خرجنا من الحاره
اذا الشعب اراد الحياه فلا بد ان يستجيب القدر
ولا بد للظلم ان ينجلى ولابد للقيد ان ينكسر
قالها شاعر تونسى وبداتها تونس
وراحت لمصر واليمن وليبا والبحرين وسوريا
خلاص الشعب بقى واثق من نفسه وحس ان صوته ليه قيمه
Pages
No comments:
Post a Comment